Павел Можаев (mevamevo) wrote,
Павел Можаев
mevamevo

  • Location:
  • Mood:

Aĥ, jes, mi ja tute forgesis rakonti... IJK-2011 en Ukrainio!

Kiel iĝis definitive klare hodiaŭ, la IJK-2011 ja okazos en Ukrainio proksime al Kievo. Mi eksciis tiun novaĵon jam la 8-an de marto el la landa diskut-listo, tamen, tie la informo estis ne sufiĉe bone vortumita, tial la definitivan certecon mi ekhavis nur hodiaŭ dank' al la oficiala informo de TEJO. Eĉ Libera Folio jam informis pri la afero, do, eble mi ne estos la unua, tamen... Kiel vi komprenas, miaj karaj E-lingvaj geamikoj, mi apartenas al la grupo de pli-malpli signifaj esperantistoj de ĉi lando, do mi esperas, ke pere de mia blogo mi povos informi vin pri iuj specifaj aŭ eble eĉ kaŝitaj detaloj... :)

Fakte, dume oni scias ne vere multon. La tuta iniciato estas ŝuldata al Mikaelo Lineckij (fama E-aktivulo, kiu, i.a., profesie instruas Esperanton en unu el la kievaj lernejoj). Li estis elektita kiel prezidanto de UkrEA pasint-aŭtune, kaj la organizo de IJK estas lia sufiĉe aŭdaca iniciato. Tamen, se la TEJO-estraro ĝin akceptis, evidente, li havis bonan persvad-kapablon. Estas jam konate, ke, krom Mikaelo mem, la eventualan LKKon (kies unua pli-malpli organiza kunveno okazos jam dimanĉe, la 14an de marto) eniris Eŭgenia Slovaĉevskaja, Andreo Jankovskij kaj iu Barkar (lin/ŝin kaj lian/ŝian personan nomon mi ne konas/scias).

La planata tempo de la kongreso estas 14-21.07.2011. Kiel la lokon oni anoncas la ripozejon de la Kieva politekniko; la ripozejo troviĝas ĉe la Kieva akvorezervujo. Jen, fakte, ĉiuj informoj, kiujn mi nun havas.

Aparta afero, pri kiu mi jam hodiaŭ atentigis la organizantojn per la landa diskut-listo, estas la nomo de la urbo, kiu gastigos la kongreson. La monstra formo "Kijivo" (kiun - ho ve! - jam transprenis eĉ Libera Folio) estos vera plago por la kongreso, almenaŭ laŭ mia opinio. Tial mi lanĉis (nu, lanĉetis) la diskuton pri la preferata urbo-nomo. Post unu-du tagoj mi preparos argumentitan pledon por la formo "Kievo"; se oni interesiĝos, mi publikigos ĝin ankaŭ ĉi tie.

Jen ĉio. Mi atendas pliajn informojn. Kiam ili aperos - mi penos prezenti ilin adekvate, akurate, delikate kaj glate :).

Tags: e-movadaj aferoj, en esperanto, ijk-2011, lingvaj aferoj
Subscribe
  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 0 comments